पुस ७ गते भद्रपुर नगरलाई बालमैत्री घोषित गरिने

पुस ७ गते भद्रपुर नगरलाई बालमैत्री घोषित गरिने
भद्रपुर ५ पौष र नेपालको पूरानो नगरपालिकाको इतिहास बोकेको भद्रपुर नगरपालिका प्रदेश १ को पहिलो बालमैत्री नगरका रूपमा पौष ७ गते घोषित हुने भएको छ ।

भद्रपुर नगरपालिकाले पत्रकार सम्मेलन गर्दै दिएको जानकारी अनुसार पौष ७ गते बालमैत्री नगरका रूपमा प्रदेश १ सामाजिक विकास मन्त्रालयले घोषणा गर्ने भएको हो ।

सामाजिक विकास मन्त्री जीवन घिमिरेले भद्रपुर नगरलाई प्रदेश १ को पहिलो बालमैत्री नगरका रूपमा घोषणा गर्ने सम्पूर्ण तयारी पूरा भएको उपप्रमुख चन्द्रमाया श्रेष्ठले जानकारी दिइन् । २०७४ मंसीरदेखि बालमैत्रीका लागि नेपाल सरकारको मापदण्ड अनुसारका कार्य अगाडि बढाइ रहेको नगरले तय भएका ४२ वटा सूचक पूरा गरेको पत्र जिल्ला समन्वय समिति झापाले दिएपछि प्रदेश १ सरकार घोषणाको चरणमा पुगेको उपप्रमुख श्रेष्ठको भनाई छ ।

उपप्रमुख चन्द्रमाया श्रेष्ठको अध्यक्षतामा सम्पन्न कार्यक्रममा फोकल पर्सन दिपक पाण्डेले बालमैत्री अभियानका क्रममा हालसम्म गरिएका प्रगति विवरण प्रस्तुत गर्नुभएको थियो ।

सामाजिक विकाश शाखाकी प्रमुख जीवनकला राउतले सञ्चालन गरेको कार्यक्रममा स्वागत प्रमुख प्रशासकीय अधिकृत होमनाथ भट्टराइले गरेका थिए ।यस घोषणासंगै झापाको सदरमुकाम समेत रहेको भद्रपुर नेपालको पाँचौं बालमैत्री स्थानीय शासन भएको नगर सरकार हुनेछ ।